عدى النهار والمغربية جايه

عدى النهـــــــــــــــار

والمغربية جاية
تتخفى
ورا ضهر الشجر
وعشان نتوه في السكة
شالت من ليالينا القمر
وبلدنا ع الترعة بتغسل شعرها
جانا نهار
ما قدرش يدفع مهرها
يا هل ترى الليل الحزين
ابو النجوم الدبلانين
أبو الغناوي المجروحين
يقدر ينسيها الصباح
ابو شمس بترش الحنين
أبدأ
أبداً بلدنا ليل نهار
بتحب موال النهار
لما يعدي في الدروب
ويغنى قدام كل دار

والليل يلف ورا السواقي
زي ما يلف الزمان
وعلى النغم
تحلم بلدنا بالسنابل
والكيزان
تحلم ببكرة
واللي هيجيبه معاه
تنده عليه في الضلمة
وتسمع نداه
تصحاله من قبل الأدان
تروح تقابله في الغيطان
في المصانع
والمعامل
والمدارس
والساحات
طالعاله رجال
أطفال
بنات
احنا بلدنا
ليل نهار بتحب
موال النهار
لما يعدي في الدروب
ويغني قدام كل دار