نــور المكان
اهلا ومرحباا عزيزى الزائر

فى منتدى نور المكان

نحن بحاجة الى مشرفين ومراقبين

اذا اردت سارع بالتسجيل .

ابويا العزيز\\شعر منى حواس

استعرض الموضوع السابق استعرض الموضوع التالي اذهب الى الأسفل

ابويا العزيز\شعر منى حواس

مُساهمة من طرف محمد اسماعيل في الإثنين مارس 21, 2016 9:05 pm

ابويا العزيز\\\(1) 
أبويا العزيز
تخيّل.....
ملامحك بتسكن وريدي
تفكّرني دايماً بكل اللي فات
باشوفك في ضحكى
واشوفك بتبكي
وأشوفك كلامي
وأشوفك سُكات
تصوّر.....
بحبّك في كل الحالات
..............
(2)
أبويا المسافر 
في ضلعي وساكن
باشوفك معايا في كل الأماكن
تجي لي وأروح لك
تروح لي وأجى لك
وكنت امّا باتعب
تشيلني....
وأشيلك....
ووقت المواجع
يقوّيني حيلك
بتقسى عليّ ساعات امّا باغلط
وقلبك يدمّع عشاني ساعات
تصوّر بحبّك في كل الحالات!!
.................
(3)
أبويا اللي فاضل 
من الذكريات ....
في ودني كلامك
وياما حكايات
حكيتْ لي عليها ف صُغري
وفات....
غُناك استخبّى في لحن الوريد
وكنت امّا باسمع كلامك باقول 
وكُلّى براءة :
ياريتك تعيدْ....
ياأبويا اللي فاضل من الذكريات
تصوّر.....
بحبك في كل الحالات 
.............
(4)
عجيب النهاردة كلامك معايا
عجيب انت كُلّك
كأنك نويت
تسيب الحاجات
تلملم قلوعك 
وتفرد ضلوعك
تقدّف مراكبك
لمطرح ما جات
.............
(5)
أبويا الحبيب
بلاش الهزار ده
أكيد إنت فاهم
دموعي النهاردة
عشان نفسي تقعد
معانا شوية 
وحتي تطمّن
ضلوعك عليّ
تسلمّني مثلاً لإيد الخليفة
فيتوصّى بيّ
واجيب لك عيالي
فيحضنها كفّك
وتلعب معاها
وترسم خُطاها
ويتملّوا حُضنك
..............
(6)
طب اقعد معانا
ووعد امّا هااغلط
هاكسّر عضامي
عشان إنت طيّب
ما تعرفش تضرب
دا أخرك بتزعل
شوية فَتسكُت
وحتى ف سكوتك
باحب السُكات
ها تقعد شوّية ؟
يا أبويا اللي عمره
ما كسّر لي كلمة
تصوّر....
بحبّك في كل الحالات 
::
منى حواس 
" رسالة لأبويا "
من ديوان : " مجرد حلم "
avatar
محمد اسماعيل
مدير الموقـع
مدير الموقـع

عدد المساهمات : 1093
تاريخ التسجيل : 26/01/2011
العمر : 53

http://norr.forumegypt.net

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى